Մարդու իրավունքների պաշտպանի նախաձեռնած` «Օրն իրավունքների պաշտպանության առաջնագծում» նախագիծը շարունակում է միավորել երիտասարդների, ովքեր պատրաստ են բարձրաձայնել մեր հասարակական միջավայրում առկա խնդիրները և մասնակցել փոփոխությունների իրականացման գործընթացներին։

Նախագծի երկրորդ մասնակիցը Տիգրան Գևորգյանն է, ով ակտիվորեն ներգրավված է տարբեր նախաձեռնություններում, հետաքրքրված է ընտրական իրավունքի իրացմանն առնչվող հարցերով, բարձրացնում է դաունի համախտանիշ ունեցող անձանց իրավունքներին և խնդիրներին առնչվող հարցերը և իր օրինակով նպաստում է ներառական ու իրազեկ հասարակության ձևավորմանը։ Մարդու իրավունքների պաշտպան Անահիտ Մանասյանի հետ Տիգրանը ծանոթացել է տարբեր նախաձեռնություններում իր ակտիվ մասնակցության շնորհիվ: Տիգրանը մեկ օր կանցկացնի Մարդու իրավունքների պաշտպանի աշխատակազմում՝ անմիջականորեն ծանոթանալով իրավունքների պաշտպանության ոլորտի աշխատանքներին։

Եթե երիտասարդ ես, վստահ ես, որ ուզում ես պատասխանատվություն ստանձնել հասարակությունում առկա մարտահրավերները բարձրաձայնելու և հաղթահարելու գործում, ապա նախագծի հաջորդ մասնակիցը կարող ես լինել հենց դու։

Մասնակիցները հնարավորություն են ունենալու անմիջականորեն ծանոթանալու Մարդու իրավունքների պաշտպանի գործունեությանը, ներգրավվելու աշխատանքային գործընթացներում, բարձրաձայնելու իրավունքներին առնչվող` մեր միջավայրում առկա խնդիրները և առաջարկելու դրանց համար լուծումներ։ Սա նաև հարթակ է՝ զարգացնելու իրավական գիտելիքները, ձեռք բերելու նոր փորձառություն և դառնալու ավելի ակտիվ ու իրազեկ քաղաքացի։

Ուղարկիր ինքնակենսագրական և մոտիվացիոն նամակ և պատմիր քո մասին՝ նշելով թե ինչո՞ւ հենց դու պետք է լինես նախագծի հաջորդ մասնակիցը։

Քո պատմությունն ուղարկիր՝ youthvoice@ombuds.am հասցեին: