Ցանկանու՞մ եք ստանալ մեր առաջարկի թարմացումները և նորությունները։

Մարդու իրավունքների պաշտպանին առընթեր Հաշմանդամություն ունեցող անձանց իրավունքների պաշտպանության հարցերով հասարակական խորհուրդը ձևավորվել է 2022 թվականին՝ Պաշտպանի որոշմամբ։

Խորհրդի նպատակը հաշմանդամություն ունեցող անձանց իրավունքների պաշտպանության ոլորտում Պաշտպանի գործունեությանն աջակցելն է՝ որպես խորհրդատվական մարմին։

Խորհուրդը ձևավորվում է հաշմանդամություն ունեցող անձանց իրավունքների պաշտպանության բնագավառում անհրաժեշտ փորձ ունեցող հասարակական կազմակերպությունների ներկայացուցիչներից և անկախ մասնագետներից:

Խորհուրդը նպաստում է Պաշտպանի և հաշմանդամություն ունեցող անձանց իրավունքների պաշտպանության ոլորտում գործունեություն իրականացնող քաղաքացիական հասարակության ներկայացուցիչների միջև համագործակցության ամրապնդմանը։ Այն ուղղված է նաև հաշմանդամություն ունեցող անձանց իրավունքների վիճակի շարունակական բարելավմանը՝ ներառյալ ոլորտում հետազոտությունների, ուսումնասիրությունների և վերլուծությունների իրականացումը, համակարգային խնդիրների բացահայտումը, ինչպես նաև դրանց հիման վրա Պաշտպանին համապատասխան առաջարկությունների ներկայացումը։

Պաշտպանին առընթեր Խորհրդում քննարկման առարկա են հանդիսանում՝

• հաշմանդամություն ունեցող անձանց իրավունքների պաշտպանության ոլորտում առկա խնդիրները և դրանց լուծման հնարավորությունները,

• կրթության, առողջապահության, զբաղվածության, սոցիալական պաշտպանության ոլորտներին, ինչպես նաև հաշմանդամություն ունեցող անձանց համար մատչելիությանն առնչվող հարցեր,

• խտրականության և մեկուսացման կանխարգելմանն ուղղված միջոցառումները,

• հաշմանդամություն ունեցող անձանց՝ ներպետական և միջազգային հարթակներում իրականացվող քննարկումներին, միջոցառումներին և նախաձեռնություններին մասնակցության խթանումը,

• քաղաքական և հասարակական կյանքին մասնակցությանն առնչվող հարցեր,

• ինչպես նաև հաշմանդամություն ունեցող անձանց իրավունքների պաշտպանության ոլորտում հանրային կարևորություն ունեցող այլ հարցեր։

Խորհուրդը նպաստում է հաշմանդամություն ունեցող անձանց ձայնի լսելիության ապահովմանը, նրանց մասնակցության խթանմանը և հավասար իրավունքների ու հնարավորությունների ապահովմանն ուղղված նախաձեռնությունների զարգացմանը։